ABŞ Kuba və Kolumbiyaya da hücum edəcək? - Trampdan şok sözlər

ABŞ Prezidenti Donald Tramp narkotik qaçaqmalçılığına qarşı mübarizə çərçivəsində Kolumbiyada hərbi əməliyyatın mümkünlüyünü istisna etməyib.

Publika.az xəbər verir ki, Ağ Ev rəhbəri bu barədə Milad və Yeni il tətillərini Mar-a-Laqo iqamətgahında keçirdiyi Vest-Palm-Biçdən Vaşinqtona gedən təyyarədə jurnalistlərin suallarını cavablandırarkən danışıb.

"Onu kokain istehsal etməyi və ABŞ-a satmağı sevən xəstə adam idarə edir. O, bunu uzun müddət etməyəcək – bunu sizə mən deyirəm", - Tramp bildirib.

ABŞ-nin Kolumbiyada hərbi əməliyyatın mümkünlüyünü nəzərdən keçirib-keçirmədiyi barədə suala Tramp "bu, yaxşı səslənir" cavabını verib.

ABŞ lideri, eyni zamanda Kuba hakimiyyəti barədə də açıqlama verib. Onun sözlərinə görə, onlar gəlir çatışmazlığı səbəbindən çökməyə yaxındır.

Onun sözlərinə görə, Kubanın hazırda heç bir gəliri yoxdur.

"Onlar bütün gəlirlərini Venesuela neftindən alırdılar, indi isə artıq heç nə əldə etmirlər. Kuba isə sözün əsl mənasında çökməyə hazırdır", - ABŞ Prezidenti söyləyib.

Vaşinqtonun Havanaya qarşı mümkün hərbi əməliyyatları ilə bağlı suala isə Tramp belə cavab verib:

"Düşünürəm ki, Kuba sadəcə çökəcək. Düşünmürəm ki, hər hansı tədbir görməliyik, görünür, sadəcə olaraq çökəcək".