ABŞ “Gecə Ovçuları”ndan sonra xüsusi helikopterləri də GÖNDƏRDİ

Xüsusi əməliyyatlar üçün istifadə olunan ABŞ-a məxsus iri hərbi helikopterlər Böyük Britaniyadakı aviabazalara köçürülüb.

Publika.az xəbər verir ki, bu barədə Forcesnews portalı məlumat yayıb.

Analitiklərin məlumatına görə, söhbət Qlosterşir qraflığındakı RAF Fairford aviabazasından gedir. Buraya "C-17 Globemaster" tipli onadək hərbi-nəqliyyat təyyarəsinin endiyi bildirilir. Böyük Britaniyanın digər hərbi bazasında — Saffolk qraflığındakı RAF Mildenhall aviabazasında isə müşahidəçilər dəqiq və güclü zərbələr endirmək imkanına malik iki ədəd silahlı "AC-130J Ghostrider" təyyarəsi qeydə alıblar.

"Forcesnews" yazır ki, hava gəmilərinin bir hissəsi ABŞ-ın Kentukki ştatındakı Fort Kempbell daxil olmaqla, Amerika hərbi obyektlərindən havaya qalxıb. Məhz burada ABŞ ordusunun 160-cı xüsusi aviasiya alayı — “Gecə Ovçuları” kimi tanınan bölmə yerləşir. Bu alay gecə vaxtı həyata keçirilən hava daşımaları üzrə ixtisaslaşıb. Nəşrin müəlliflərinin qeyd etdiyinə görə, bir sıra rezonans doğuran xüsusi əməliyyatlarda iştirak edib.

Mənbələrin məlumatına əsasən, Fairford aviabazasına enən "C-17" təyyarələri ən azı beş ədəd "MH-60M Black Hawk" və bir ədəd "MH-47G Chinook" helikopteri gətirib. Hər iki helikopter modeli 160-cı xüsusi aviasiya alayının arsenalındadır.

Jurnalistlər xatırladır ki, “Gecə Ovçuları” daha əvvəl də xüsusi əməliyyat qüvvələrinin təlimlərində iştirak etmək məqsədilə Böyük Britaniyada yerləşdirilmişdi.

Hüseyn İbadlı