Alim Qasımovun yubileyi keçiriləcəkmi? - ÖZƏL

“Alim Qasımovun növbəti dövrlər üçün Türkiyəyə və Portuqaliyaya səfərləri nəzərdə tutulur. Artıq bu ölkələrdə keçiriləcək konsertlərin proqramı da hazırdır. Amma hələlik vaxtı dəqiq deyil. Alim müəllim bu konsert proqramlarına qızı Fərqanə xanımla birgə qatılacaq”.

Bunu Publika.az-a açıqlamasında Xalq artisti Alim Qasımovun meneceri Səadət Fərzəliyeva deyib.

O bildirib ki, 2023-cü ilə qədər həmin konsert proqramlarının dəqiq tarixi müəyyənləşdirilməlidir: “Müəyyən konsert təklifləri var. İndi uyul ayıdır. Adətən bu məsələlər iyuna qədər həll olunur. İyul və avqust ayları boş keçir. Sentyabrdan yenidən konsertlərlə bağlı işlər, dəqiqləşdirmələr aktivləşir. Dəqiqləşdirilmiş səfərlər var, amma tarixləri məlum deyil. Bu yaxınlarda Budapeştdə Alim müəllimin konserti baş tutdu. Portuqaliya və Türkiyə dəqiqləşmiş konsertlərdir. Bundan başqa, Moskvadan Alim Qasımovun sentyabr ayında konsert verməsi ilə bağlı təklif gəlib. Amma hələlik dəqiq deyil”.

Səadət Fərzəliyevanın Xalq artisti Alim Qasımovun yubileyinin keçirilib-keçirilməyəcəyi ilə bağlı sualımıza cavabı birmənalı olmayıb: “Bəli, bu il böyük sənətkarımız Alim Qasımovun 65 illik yubileyidir. Amma hələlik bu barədə dəqiq bir şey yoxdur. Allahın izni ilə yəqin ki, yubiley olacaq”.

Tural Turan