Rus tankları həmin gün Kiyevə girəcək - XƏBƏRDARLIQ

“American Thinker” nəşri yazır ki, Ukrayna ilə hipotetik hərbi münaqişə yaranarsa, Kiyevi ələ keçirmək üçün Rusiyaya 1 gündən az vaxt lazım olacaq.

Publika.az-ın məlumatına görə, nəşr vurğulayır ki, “Soyuq müharibə” bitdikdən sonra NATO-nun Şərqə doğru genişlənməsi səhv idi və bu, hazırkı gərgin vəziyyətə gətirib çıxarıb.

Müəlliflərin fikrincə, Şimali Atlantika Alyansı (NATO) Ukraynanı təşkilata daxil etməyə cəhd etsə, hərbi əməliyyatlar mümkündür.

Jurnal qeyd edir ki, mümkün hərbi əməliyyatların başlaması Rusiya üçün hərbi, siyasi və ya iqtisadi baxımdan xüsusi risklər daşımır.

Nəşr xatırladır ki, Rusiya ordusu Ukrayna silahlı qüvvələrindən üstündür və ABŞ Prezidenti Co Bayden NATO-nun Moskva ilə Kiyev arasında mümkün hərbi münaqişəyə müdaxilə etməyəcəyini açıq şəkildə bəyan edib. Bundan əlavə, Amerika lideri fikrini dəyişsə belə, hərbi potensialını azaldan alyans ölkələri Rusiya ordusu ilə rəqabət apara bilməyəcək.

Müəlliflər iddia edirlər ki, siyasi nəticələr yalnız qınama ilə məhdudlaşacaq və Qərb Moskvaya iqtisadi cavab verə bilməyəcək.

“Demokratlar iqtisadi baxımdan çətin ki, yeni anti-Rusiya sanksiyalarını dəstəkləsinlər. Onlar bu fikrə qarşı çıxacaqlar, çünki məhdudiyyətlər şübhəsiz ki, pandemiyanın yaratdığı cari iqtisadi tənəzzülü daha da şiddətləndirəcək və onların öz iqtisadiyyatlarını vuracaq böhrana səbəb olacaq”, - deyə təhlil yazısında qeyd olunur.

Qeyd edək ki, son zamanlar Qərb mətbuatında iki ölkənin sərhədində qoşunların cəmləşməsi səbəbindən Rusiyanın Ukraynaya müdaxiləsi təhlükəsi ilə bağlı siyasətçilərin xəbərlərinə və bəyanatlarına daha çox yer verilir. Rusiya Prezidentinin mətbuat katibi Dmitri Peskov qeyd edib ki, Kreml silahlı qüvvələri öz ərazisi daxilində və öz mülahizəsinə uyğun hərəkət etdirir, bu hərəkətlər heç kimi təhdid etmir və heç kəsi narahat etməməlidir. Rəsmi Moskva vurğulayıb ki, Rusiyanın hücumu ilə bağlı xəbərlər NATO qüvvələrinin sərhəd bölgələrində qurulması üçün bəhanə kimi istifadə olunur.

Akqabay