Müharibəyə hazırlıq başladı: Bu ölkə Rusiya və Belarusla sərhədləri minalayır

“Soyuq Müharibə”dən bəri ilk dəfə olaraq Polşa hakimiyyəti şərq sərhədlərini minalamaq üçün piyada əleyhinə minaların kütləvi istehsalına başlamaq və onları Ukraynaya ixrac etməyi nəzərdən keçirmək qərarına gəlib.

Publika.az xəbər verir ki, bu barədə Polşa müdafiə nazirinin müavini Pavel Zalevski “Reuters” agentliyinə verdiyi müsahibədə bildirib. O əlavə edib ki, Varşava bu məhsulların mümkün qədər tez bir zamanda böyük miqdarda alınmasında maraqlıdır.

Nazir müavini piyada əleyhinə minaların Polşanın Belarus və Rusiya ilə sərhədlərini möhkəmləndirməyə yönəlmiş "Şərq Qalxanı" proqramının bir hissəsi olacağını bildirib.

“Reuters”in istehsalın mümkün başlama tarixi ilə bağlı sualına cavab olaraq Zalevski bildirib ki, ölkə piyada əleyhinə minaları qadağan edən Ottava Konvensiyasından çıxdıqdan sonra, gələn il istehsalına başlamaq istəyir. "Bizim belə ehtiyaclarımız var", - deyə o vurğulayıb.

Rəsmi şəxs həmçinin qeyd edib ki, Ukraynaya potensial mina tədarükü istehsal imkanlarından asılı olacaq. O əlavə edib ki, Polşanın öz müdafiə ehtiyacları prioritet olaraq qalır, lakin Ukrayna Varşava üçün əsas diqqət mərkəzində qalır. "Bizim üçün Ukrayna cəbhəsi mahiyyət etibarilə Avropa və Polşa təhlükəsizliyi xəttidir", - Zalevski deyib.

“Reuters” agentliyinin məlumatına görə, Polşa avqust ayında Ottava Konvensiyasından çıxma prosesinə başlayıb. Ölkə hakimiyyəti əvvəllər piyada əleyhinə mina istehsalının bərpası imkanını nəzərdən keçirmişdi, lakin bu günə qədər rəsmi qərar qəbul edilməyib. Zalevskinin açıqlamaları Varşavanın bu addımı həyata keçirmək niyyətində olduğunun ilk rəsmi təsdiqi olub.

Tural