Dizayn

İnteryerdə ehtişam və dəbdəbənin yeni simvolu – FOTOLAR

22 Aprel 2016 03:43

Evinizi klassik üslubda bəzəməyə qərar vermisinizsə, burada bahalı və təbii materiallardan hazırlanan aksessuar və əşyalar üstünlük təşkil etməlidir. Yüksək keyfiyyətli təbii materialların istifadəsi çox gözəl zövqün və prestijin nümayişidir. Buna görə də klassik üslubda daş, qızılı bəzəklər, ipək və atlas kimi təbii parçalara daha çox yer verilir. Qızılı çalarlar da əvvəllər klassik üslubun ayrılmaz elementlərindən biri sayılırdı. Amma dizaynerlər indi otağın hansı üslubda dizayn edilməsindən asılı olmayaraq, qızıl parıltısından yararlamağa icazə verir.

Bəzən kiçik qızılı aksessuar belə qonaq otağının görünüşünü tamamilə dəyişdirib daha təmtəraqlı göstərməyə qadirdir. Məsələn, qızılı çilçıraq və lampa otağı zadəgan üslubuna bürüyə bilir. Qızılı haşiyələrə alınmış aynalar, şəkil çərçivələri bu məsələdə sizə yardım edə bilər. Qonaq otağının bir az parıltılı və ehtişamlı görünməsi üçün qızılı tonlarına müraciət edə bilərsiniz. Antik oturacaqların kənarlarını da qızılı rənglərə bürüyə bilərsiniz.

Qızılı tonlardan istifadə edərkən ölçü hissini itirməyin. Mebellər və aksessuarlarda qızılı rəngin çalarlarından istifadə etmisinizsə, divar kağızlarını mümkün qədər sadə seçməlisiniz.

Aytən