Ruslar “İsgəndər” atdı: Ukrayna havadan zərbələr endirdi

Ukrayna qoşunları dünən bəzi istiqamətlərdə müdafiənin konkret sahələrində vəziyyəti müsbətə doğru dəyişən taktiki əks-hücum əməliyyatları həyata keçirib.

Publika.az xəbər verir ki, bunu Ukrayna Prezident Aparatı rəhbərinin müşaviri Aleksey Arestoviç deyib.

“Dünən bəzi istiqamətlərdə qoşunlarımız kiçik taktiki əks-hücum əməliyyatları keçirib ki, bu da müdafiənin konkret sahələrində vəziyyəti yaxşılaşdırıb. Qoşunlarımız həmçinin düşmən qruplaşmalarına güclü raket-artilleriya və hava zərbələri endirib. Ən azı 7 belə zərbə endirilib” - Arestoviç qeyd edib.

O əlavə edib ki, Ukrayna Hərbi Hava Qüvvələri ən azı 3 təyyarə, 1 helikopter və bir neçə qanadlı raketi vurub: “Düşmən cavab olaraq strateji təyyarələrdən və “İsgəndər” tipli ballistik raketlərdən Ukrayna ərazisindəki mülki obyektlərə zərbələr endirib”.

Aleksey Arestoviç Rusiya ordusunun atdığı raketlərin 2/3-nin mülki hədəfləri vurduğunu vurğulayıb: “Görünür, bu, qəsdən edilir”.

Onun sözlərinə görə, Ukrayna ətrafında ümumi vəziyyət və cəbhə xəttindəki ən qaynar nöqtələr gün ərzində dəyişməyib: “Çünki Rusiya Federasiyası öz resurslarını istifadə edib. Suriya və Liviyadan muzdluları, onların bölmələrinin hissələrini köçürmək cəhdləri hələ ki, baş tutmayıb. Yəni, onların heç bir ehtiyatı yoxdur. Bu, həm bizim qiymətləndirmədə, həm də aparıcı Qərb ekspertlərinin qiymətləndirməsində belədir”.

Arestoviç həmçinin qeyd edib ki, rusların əsas səyləri Birgə Qüvvələr Əməliyyatı zonasında cəmləşib: “Lakin dünən onlar İzyum və Nikolayev istiqamətində itkilər verdilər və hətta müəyyən dərəcədə Ukraynanın xeyrinə olan taktiki döyüşlərdə bataqlığa düşdülər”.