Türkiyədən "F-35" MESAJI: ""Hurjet" onu geridə qoyacaq"

Türkiyənin hazırladığı yüngül hücum təyyarəsi "Hurjet" performans xüsusiyyətlərinə görə Amerikanın beşinci nəsil "F-35" qırıcısını geridə qoyacaq.

Publika.az xəbər verir ki, bu bəyanatla ölkənin müdafiə sənayesi idarəsinin rəisi İsmayıl Dəmir çıxış edib.

"Yüngül hücum təyyarəmiz "Hurjet" gələn il ilk uçuşunu edəcək. Qırıcımız "F-35"dən daha təkmil xüsusiyyətlərə malikdir. Təyyarə gələn il martın 18-də anqardan çıxarılacaq", - deyə Star qəzeti onun sözlərinə sitat gətirib.

Nazir, türk hücum təyyarəsinin Amerikanın beşinci nəsil qırıcı-bombardmançısını tam olaraq hansı xüsusiyyətləri ilə üstələyəcəyini izah etməyib.

"Hurjet" Türkiyənin “Hürkuş” təlim-məşq təyyarələrinin reaktiv versiyasıdır. O, 2017-ci ildən Türkiyənin aerokosmik şirkəti TAI (Turkish Aerospace Industries) tərəfindən hazırlanıb. "Hurjet" 13,7 min metrə qədər yüksəklikdə uçacaq və üç min kq-a qədər faydalı yük daşıyacaq. Əvvəllər hücum təyyarəsinin ilk uçuşunun 2022-ci ildə baş tutacağı gözlənilirdi, lakin sonra 2023-cü ilə təxirə salınıb.