Rus qoşunları daha bir şəhəri nəzarətə götürdü

Mayın 31-i axşama olan məlumata görə, Rusiya qoşunları Severodonetskin əksər hissəsinə nəzarət edir.

Publika.az xəbər verir ki, bu barədə "RBC-Ukrayna" Luqansk vilayət hərbi administrasiyasının rəhbəri Sergey Qaydaya istinadla məlumat yayıb.

"Şəhər daxilində döyüşlər gedir, rus qoşunları təəssüf ki, şəhərin əksər hissəsinə nəzarət edir. Ancaq hardasa hərbçilərimizin mühasirəyə alınacağı qorxusu var. Amma bu baş verməyəcək. Manevr etmək mümkündür", - o deyib.

S.Qaydayın sözlərinə görə, Ukrayna qoşunları tutduqları mövqeləri sakitcə müdafiə edirlər. Dağıntıya gəlincə, Severodonetsk bu səviyyə baxımından Rubijne və Popasnaya yaxınlaşır: demək olar ki, bütün kritik infrastruktur dağıdılıb, mənzil fondunun 90%-i zədələnib, bunun yarıdan çoxunu bərpa etmək mümkün deyil.

Xatırladaq ki, bundan əvvəl Rusiya təyyarələri Severodonetskdəki kimya zavodunun ərazisinə hücum etmişdi. Nəticədə şəhərin üzərində zəhərli bulud qalxıb, yerli sakinlərdən azot turşusu dumanlarına görə sığınacaqlarını tərk etməmələri xahiş olunub.