Serbiyalı nazir: “Lavrovun Belqrad səfərinin pozulması yaxşı oldu”

Serbiya baş nazirinin müavini, dağ-mədən və energetika naziri Zorana Mixayloviç bildirib ki, Rusiyanın xarici işlər naziri Sergey Lavrovun Serbiyaya iyunun 6-7-nə planlaşdırılan səfəri həm Belqrad, həm də prezident Aleksandr Vuçiç üçün çətin vəziyyət yarada bilərdi. Ona görə də səfərin təxirə düşməsi yaxşı olub.

Publika.az xəbər verir ki, Z.Mixayloviç deyib:

“Biz həqiqətən də çətin bir dövrdə enerji, maliyyə və siyasi mənada ayaqda qalmağa çalışırıq və düşünürəm ki, bizə lazım olan ən son şey dünya problemlərinin bizim çiyinlərimiz üzərindən həll edilməsidir”.

Bundan əvvəl Serbiyanın “Veçerniye novosti” qəzeti yazıb ki, Bolqarıstan, Şimali Makedoniya və Monteneqro öz hava məkanını Lavrovun olduğu təyyarənin Serbiyaya uça bilməməsi üçün bağlayıb.

Həmçinin, Rusiyanın Podqoritsadakı səfiri Vladislav Maslennikov bildirib ki, Monteneqro hakimiyyəti S.Lavrovun təyyarəsinin uçuşu üçün hava dəhlizi verməkdən imtina edib.

Rusiyanın baş diplomatı bir sıra Avropa ölkələrinin onun təyyarəsini Serbiyaya buraxmamaq qərarını ağılsızlıq adlandırıb.