İsveç parlamenti antiterror qanunlarını sərtləşdirdi

İsveç parlamenti terrorizmlə mübarizə üzrə mövcud qanunvericiliyi sərtləşdirən düzəlişləri qəbul edib.

Publika.az xəbər verir ki, bu barədə “Associated Press” (AP) məlumat yayıb.

Xüsusilə, terrorçu təşkilatların fəaliyyətində iştiraka görə, əgər müttəhim bu təşkilata dəstək və ya təbliğatda iştirak edibsə, həbs müddəti dörd ilədək artırılıb. Təşkilatın üzvü ağır cinayətdə ittiham olunarsa, müddət səkkiz ilə qədər uzadıla bilər.

Terror təşkilatının liderini indi ömürlük həbs gözləyir ki, bu da İsveçdə minimum 20-25 il həbs deməkdir.

Bundan əlavə, indi qanun terror təşkilatlarını maliyyələşdirməyi qadağan edir. Belə bir qrupa qoşulmaq üçün xaricə səfər etmək də qanunsuz olacaq.

Qəbul edilmiş düzəlişlər iyunun 1-dən qüvvəyə minəcək. Onların lehinə 268 deputat, əleyhinə 34 deputat səs verib, 47 deputat bitərəf qalıb.

İsveç və Finlandiya 2022-ci ildə NATO-ya üzv olmaq üçün müraciət edib. Türkiyə onların quruma üzvlüyü üçün terrorçuları dəstəkləməmələri ilə bağlı şərt irəli sürüb. Finlandiya bu ilin martında NATO-ya rəsmi şəkildə üzv olub.

Türkiyə Prezidenti Rəcəb Tayyib Ərdoğan daha əvvəl bildirib ki, İsveç rəsmi Ankaranın tələblərini yerinə yetirməsə, NATO-ya üzvlüyü ratifikasiya edilməyəcək. O deyib ki, Türkiyənin hələ də İsveçdən bəzi gözləntiləri var və onlar yerinə yetirilməyib.

Xatırladaq ki, NATO-nun Vilnüs sammiti iyulun 11-12-də keçiriləcək.