Rusiya Donetsk aeroportunu almağa hazırlaşır

Rusiya Donetsk aeroportunun yaxınlığında pilotsuz təyyarələr və ağır zirehli texnika yerləşdirib.

Publika.az-ın unian.net saytına istinadən verdiyi məlumata görə, bu barədə Ukrayna Milli Təhlükəsizlik və Müdafiə Şurasının informasiya-analitik mərkəzinin nümayəndəsi Andrey Lısenko bildirib.

“Donetsk aeroportu üçün döyüşlər fasiləsiz davam edir. Dünən Ukrayna hərbçiləri quldurlar və Rusiya muzdlularının hücumlarını iki dəfə dəf edib. Ərazidə zirehli texnika, ağır artilleriya və xeyli sayda şəxsi heyətin hərəkəti kəşfiyyatımız tərəfindən qeydə alınıb. Əraziyə həmçinin Rusiya mütəxəssisləri tərəfindən idarə olunan hava kəşfiyyatı vasitələri gətirilib”, - deyə A.Lısenko vurğulayıb.

O, Donetsk aeroportuna antiterror güclərinin nəzarət etdiyini və obyektin müdafiəsi üçün bütün mövqelərin gücləndirildiyini qeyd edib.

Xatırladaq ki, oktyabrın 1-də “Donetsk Xalq Respublikası” separatçı qurumun "baş nazir"i Aleksandr Zaxarçenko jurnalistlərə açıqlamasında həftənin sonuna kimi Donetsk aeroportunu tamamilə ələ keçirəcəklərini bildirib: “İki, maksimum üç gün Donetsk aeroportu bizim nəzarətimizə keçəcək”.

Ömər Dağlı