Alimlərdən qorxunc xəbərdarlıq: Dayanarsa, 230 milyon insan...

Almaniyada aparılan son araşdırma planetin gələcəyi ilə bağlı ciddi təhlükə siqnalı verib. Bonn Universitetinin alimləri müəyyən ediblər ki, dünyanın ən böyük okean axını olan Antarktika Dairəvi Cərəyanı (ACC) son 130 min ildə ən aşağı sürətlə hərəkət edir.

Publika.az "Hürriyət"-ə istinadən xəbər verir ki, Qərb küləkləri ilə idarə olunan bu nəhəng sistem okeanlarda istiliyi, karbonu və qida maddələrini daşımada həyati əhəmiyyət kəsb edir.

Tədqiqatçılar xəbərdarlıq edirlər ki, ACC-nin bu qədər zəifləməsi qlobal iqlimin tarazlığını poza, okeanların karbon udma qabiliyyətini azalda və nəticədə qlobal istiləşməni sürətləndirə bilər.

"Melburn" Universitetinin mütəxəssisləri superkompüterlə apardıqları simulyasiyalarda göstəriblər ki, insan fəaliyyəti nəticəsində yaranan iqlim dəyişikliyi 2050-ci ilə qədər axının sürətini daha 20 faiz azalda bilər. Bu, Antarktida buzlaqlarının daha tez əriməsinə, dəniz səviyyəsinin qalxmasına və qlobal hava nümunələrinin dəyişməsinə gətirib çıxara bilər.

Alimlər bildirirlər ki, ACC təkcə iqlim sabitliyi üçün deyil, həm də qlobal ekosistem və balıqçılıq sənayesi üçün “sədd” rolunu oynayır. Onun zəifləməsi isti suların və invaziv növlərin Antarktidaya daxil olmasına şərait yaradacaq, bu isə buzlaqların əriməsini daha da sürətləndirəcək.

Tədqiqatda qeyd olunur ki, dəniz səviyyəsində cüzi yüksəliş belə, hazırda yüksək gelgit xəttinin bir metrliyində yaşayan 230 milyon insan üçün fəlakətli nəticələrə səbəb ola bilər.

“Bu, sadəcə elm deyil, real təhlükədir. Əgər proses bu templə davam edərsə, iqlim sistemində geri dönməz dəyişikliklər baş verə bilər,” - deyə Bonn Universitetindən professor Maykl Ueber xəbərdarlıq edib.

Roza