Vaşinqtonla kritik danışıqlar: İsraildə strateji dəyişiklik planlanır

İsrail hökuməti ABŞ ilə hərbi əməkdaşlığı yeni səviyyəyə qaldırmaq üçün tədbirlər görüb.

Publika.az "Financial Times" nəşrinə istinadla xəbər verir ki, Təl-Əviv Donald Tramp administrasiyası ilə yeni 10 illik təhlükəsizlik müqaviləsi imzalamağı hədəfləyir.

Lakin bu dəfə plan adi pul vəsaitlərinin axınından fərqli bir strategiyanı əhatə edir. İsrail liderləri Amerika qrantlarına əsaslanan gələcəyə deyil, birgə müdafiə layihələrinə üstünlük verən modelə diqqət yetirirlər.

İsrail Müdafiə Nazirliyinin və ordusunun maliyyə məsləhətçisi vəzifəsində çalışan Gil Pinçasın sözlərinə görə, danışıqlar yaxın həftələrdə başlayacaq. "Bu kontekstdə tərəfdaşlıq sadəcə maliyyə məsələsini əhatə etmir. Məsələyə daha geniş perspektivdən baxılmalıdır", - deyə o qeyd edib.

Baş nazir Benyamin Netanyahu da bu yaxınlardakı çıxışlarından birində İsrailin on il ərzində ABŞ yardımından asılılığını azaltmağı hədəflədiyini bildirib.

Qeyd edək ki, iki ölkə arasında mövcud hərbi maliyyə yardımı müqaviləsi 2016-cı ildə Obama administrasiyası dövründə imzalanıb. 2028-ci ilin sentyabr ayına qədər qüvvədə olan bu 10 illik müqavilə ümumilikdə 38 milyard dollarlıq nəhəng bir paketi əhatə edir. Bu məbləğin 33 milyard dolları hərbi texnikanın alınması üçün qrant, 5 milyard dolları isə raketdən müdafiə sistemləri üçün ayrılıb.

Roza