Hörmüzün blokadası necə həyata keçiriləcək? - Uzunmüddətli müharibə qaçılmazdır

Xəbər verdiyimiz kimi, ABŞ Mərkəzi Komandanlığı (CENTCOM) bu gün saat 10:00-da (Bakı vaxtı ilə saat 19:00) İran limanlarına daxil olan və çıxan bütün dəniz nəqliyyatına blokada tətbiq olunacağını bəyan edib.

Publika.az xəbər verir ki, "The Wall Street Journal" (WSJ) qəzeti ABŞ ordusunun belə bir blokadanı həyata keçirmək üçün resursları və imkanları olduğunu bildirib.

Lakin ABŞ rəsmiləri və analitikləri su yoluna nəzarəti qorumağın daha çətin ola biləcəyi barədə xəbərdarlıq edirlər.

Hudson İnstitutunundan ekspert Brayan Klarkın sözlərinə görə, əgər blokada prosesi başlasa, bölgədəki vəziyyət daha da gərginləşəcək: “Oradakı qüvvələrin mütləq blokada yaratmaq imkanı var. Lakin İran onlara və ya bu sistemlərdən istifadə edən hər kəsə atəş açmağa başlasa, əlbəttə ki, işlər daha da çətinləşəcək”.

"The Washington Post"un məlumatına görə, Donald Tramp dəfələrlə ABŞ ordusunun İran donanmasını məhv etdiyini elan etsə də, İran İnqilab Keşikçiləri Korpusunun (SEPAH) əhəmiyyətli bir qüvvəsi toxunulmaz olaraq qalır.

Vaşinqton İnstitutunun İran üzrə baş elmi işçisi Fərzin Nədimi vurğulayıb ki, İranın boğazı idarə etmək üçün istifadə etdiyi sürətli hücum qayıqlarının 60 faizindən çoxu hələ də işlək vəziyyətdədir və ABŞ ordusu üçün təhlükə yaratmağa davam edir. Ekspert qeyd edib ki, bu vəziyyət ABŞ-ın blokada əməliyyatının gözləniləndən daha çətin ola biləcəyini göstərir.

Məlumata görə, Hörmüz boğazının xaricində ABŞ Hərbi Dəniz Qüvvələrinin böyük bir iştirakı Trampa nəqliyyatın hərəkətini pozmaq və neft tankerlərini ələ keçirmək imkanı verəcək. Ərəb dənizində yerləşən “USS Abraham Lincoln” təyyarədaşıyan gəmisi də bölgədə baza kimi xidmət edə bilər. Münaqişənin əvvəlində ABŞ-ın bölgədə səkkiz idarə olunan raket esminesi də yer alıb. Esmineslər həmçinin İranın ABŞ gəmilərinə hücum etməsi halında hava təhdidlərini dəf etmək üçün istifadə olunacaq.

Lakin analitiklərin fikrincə, Körfəzin coğrafiyası Qırmızı dənizdən daha dardır və İranın nəzarətində olan adaların sahillərindən atəş açılsa, hərbi gəmilərin cavab vermək üçün vaxtı az olacaq.

“CNN International”-ın məlumatına görə, İran küncə sıxışdırılarsa, Səudiyyə Ərəbistanı və BƏƏ-nin yan boru kəmərlərinə hücum edə və bu da Körfəzdə alternativ variantları iflasa uğrada bilər.

Neft bazarı tədqiqatçısı Rori Conston bildirib ki, ABŞ-ın İrana qarşı müharibəsi indiyə qədər Körfəzdən gündə təxminən 13 milyon barel neftin keçməsinin qarşısını alıb ki, bu da qlobal neft ticarətinin təxminən 12 faizini təşkil edir. Conston qeyd edib ki, ABŞ İran satışlarını uğurla bloklasa, qlobal balans gündə təxminən 2 milyon barel azalacaq.

Müəllif: Roza Şəfiyeva