Trampın “əfv bazarı”: Azadlığın qiyməti bir milyon dollardan başlayır

İddiaya görə, ABŞ prezidenti Donald Tramp onu dəstəkləyən və ya ödənişlər edən məhbusları əfv edir.

Publika.az xəbər verir ki, bu barədə “El Pais” nəşri məlumat yayıb.

Bildirilib ki, Trampın Konstitusiya ilə verilən prezident əfvi səlahiyyətindən istifadəsi Ağ Evə yaxın olanların və "pulu olanların" bəraət almasında rekord artıma səbəb olub.

İddiaya görə, Trampın əfv siyahısına kriptovalyuta milyarderləri, respublikaçı siyasətçilər, televiziya ulduzları, hətta ABŞ-a yüzlərlə ton kokain qaçaqmalçılığı əməliyyatındakı roluna görə 45 il həbs cəzasına məhkum edilmiş keçmiş Honduras prezidenti Xuan Orlando Hernandez daxildir.

Trampın "əfv həvəsi", xüsusən də ikinci prezidentlik müddətində rekord səviyyəyə çatıb. O, 2025-ci ilin yanvar ayında ikinci müddətinə başladığı ilk gündə, 2021-ci ildə Kapitoli hadisələrində iştirak etdiklərinə görə məhkum edilmiş təxminən 1600 nəfəri əfv edib və ya cəzasını yüngülləşdirib. O vaxtdan 2026-cı ilin mart ayının sonuna qədər bu siyahıya daha 199 şəxs əlavə edilib.

Məlumata görə, siyasi qərarlara təsir etmək və qarşılığında ödəniş almaq üçün təzyiq göstərən bəzi mütəxəssislər “əfv bazarında” yeni bir iş imkanı görürlər. Onlar əfv istəyənlər üçün “vəkil” olurlar və bir milyon dollardan başlayan ödənişlər tələb edirlər.

Əfv olunmağın digər yolu isə, birbaşa Trampla əlaqə saxlamaqdır. Ağ Evin mətbuat katibi Karolin Leavitt bildirib ki, əfvlər Ədliyyə Nazirliyi və Ağ Ev müşaviri ilə ciddi prosesdən keçir, lakin son qərar yenə də Trampın ixtiyarındadır.

Müəllif: Roza