Dünya

Mübahisəli plan təsdiqləndi - Eskobarın begemotları məhv ediləcək

14 Aprel 2026 17:17

Kolumbiya məşhur narkobaran Pablo Eskobara məxsus begemotların (su atı-red.) məhv edilməsi planına yaşıl işıq yandırıb.

Publika.az xəbər verir ki, bu barədə Kolumbiya ətraf mühit naziri İrene Velez açıqlama yayıb.

Onun sözlərinə görə, begemotları nəzarətdə saxlamaq üçün sterilizasiya və zooparklara yerləşdirmə kimi tədbirlər təsirli olmayıb və onların məhv edilməsi planı təsdiqlənib.

"Bu qərar təxminən 80 begemota tətbiq olunacaq. Bunu etməsək, begemot populyasiyasını nəzarətdə saxlaya bilmərik. Ekosistemimizi qorumaq üçün bunu etməliyik”, - deyə o bildirib.

Qeyd edək ki, Pablo Eskobarın ölümündən sonra, onun bütün heyvanları ölkə daxilindəki zooparklara köçürülüb. Hakimiyyət orqanları bildirir ki, təxminən 30 il ərzində Eskobarın begemotları çoxalmağa davam edib. Bununla da, ölkədəki hazırkı begemot populyasiyası həddindən artıqdır və bu da ekosistemə zərər verə bilər.

Müəllif: Roza