Çin Afrikanın 53 ölkəsinə "cənnətin qapısı"nı açdı: Yalnız bir dövləti kənarda saxladı

Çin Afrika ilə ticarət siyasətində mühüm addım atıb.

Publika.az “Rossiyskaya qazeta”ya istinadən xəbər verir ki, rəsmi Pekin Afrika ölkələri üçün idxal rüsumlarını sıfırladığını açıqlayıb.

Yeni qərara əsasən, 1 may 2025-ci ildən etibarən 53 Afrika ölkəsi Çin bazarına tam rüsumsuz çıxış əldə edəcək və bu rejim 30 aprel 2028-ci ilə qədər qüvvədə qalacaq.

Diqqətçəkən məqam isə odur ki, bu siyahıdan yalnız bir ölkə - Esvatini kənarda saxlanılıb. Səbəb isə bu ölkənin Tayvan ilə diplomatik əlaqələri qorumasıdır.

Qeyd edək ki, daha əvvəl bu güzəştlər yalnız Afrikanın 33 ən az inkişaf etmiş ölkəsinə şamil olunurdu. Yeni qərarla Çin dünyada ilk böyük iqtisadiyyat kimi Afrika ölkələrinə birtərəfli şəkildə, heç bir tarif maneəsi olmadan bazarını açmış oldu.

Ekspertlər bu addımı Pekinin qitədə siyasi və iqtisadi təsirini artırmaq cəhdi kimi qiymətləndirirlər. Analitiklər hesab edir ki, rüsumların ləğvi gözlənildiyi qədər ciddi dönüş yaratmaya bilər.

Bundan başqa, ticarət balansı ciddi şəkildə Çinin xeyrinə qalmaqda davam edir. Afrikanın Çinlə ticarətdə kəsiri ötən il 65% artaraq rekord həddə - 102 milyard dollara çatıb.

Qeyd olunur ki, bu yeni rejimdən ən çox fayda əldə edəcək ölkələr Afrikanın nisbətən inkişaf etmiş iqtisadiyyatları olacaq. Xüsusilə Cənubi Afrika Respublikası və Mərakeş kimi ölkələr əlavə dəyərli məhsulların ixracını artırmaq üçün real imkanlar qazanacaq.

Müəllif: Adəm