Bir dərmana görə təyyarəni məcburi endirdi: 360 sərnişin saatlarla hava limanında qaldı

Meksikadan Böyük Britaniyaya uçan sərnişin təyyarəsində qalmaqallı hadisə baş verib. TUI aviaşirkətinə məxsus təyyarə bir sərnişinin qeyri-adekvat davranışına görə marşrutunu dəyişmək məcburiyyətində qalıb.

Publika.az xəbər verir ki, hadisə iyunun 5-də Meksikadan Böyük Britaniyaya uçuş zamanı baş verib.

Məlumata görə, kişi sərnişin uçuş zamanı qapını açaraq təyyarəni tərk etməyə cəhd edib. O, həmçinin digər sərnişinlərdən birində bıçaq gördüyünü iddia edərək təyyarədə təşviş yaradıb.

Stüardlar sərnişini zərərsizləşdirməyə müvəffəq olsalar da, vəziyyətin təhlükəli olması səbəbindən pilotlar təcili eniş qərarı veriblər. “Boeing 787” təyyarəsi Kanadanın Qander şəhərinə enib.

Lakin hava limanı ətrafındakı hotellərdə boş yer olmadığından sərnişinlər təxminən 14 saat aeroportda gözləməli olublar. Onların bir qismi gecəni hava limanının soyuq döşəməsində keçirməyə məcbur qalıb.

Reys ertəsi gün Mançester istiqamətində yoluna davam edib.

Hadisəni törədən şəxsin həyat yoldaşı isə ərinin davranışını uçuşdan əvvəl Meksikada bir taksi sürücüsündən aldığı dərmanla əlaqələndirib. Onun sözlərinə görə, həmin preparat kişinin səhhətinə və davranışına mənfi təsir göstərib.

Adəm