Kolumbiyada İsraillə bağlı qalmaqal: Petro yeni prezidenti ittiham etdi

Kolumbiya prezidenti Qustavo Petro avqustun 7-də vəzifəni təhvil verəcəyi sağçı Abelardo de la Espriella hökumətinin İsraillə diplomatik münasibətləri bərpa etmək planını sərt şəkildə tənqid edib.

Publika.az xəbər verir ki, Bolivar şəhərində çıxışı zamanı Petro yeni hökuməti tanımadığını və ona qarşı küçələrdə güclü müxalifət formalaşdıracağını bildirib.

O, İsraillə münasibətlərin bərpası vədinə toxunub: “Qəzzada 22 min körpəni raketlərlə öldürən hökumətlə diplomatik münasibətləri yenidən qurmaq istəyirlər. Bu, milli şərəfimizə təhqirdir. Soyqırıma alqış tutmaq faşizmin özüdür”.

Petro həmçinin ABŞ prezidenti Donald Tramp və Dövlət katibi Marko Rubionu Kolumbiyadakı prezident seçkilərinə müdaxilə etməkdə ittiham edib. O, ABŞ administrasiyasının Espriellanın xeyrinə seçki prosesinə təsir göstərdiyini iddia edərək seçkilərin legitimliyinə kölgə salındığını bildirib.

Kolumbiya prezidenti seçkilərin nəticələrini tanımayacağını bir daha vurğulayıb və solçu namizəd İvan Kepedanın xalq tərəfindən seçildiyini iddia edib. Petro seçkilərdə saxtakarlıqla bağlı sübutların məhkəməyə təqdim ediləcəyini açıqlayıb.

Ölkədəki sosial və təhlükəsizlik vəziyyətindən də danışan Petro yoxsulluğun və cinayət səviyyəsinin azaldığını bildirib.

Müəllif: Roza