NATO hərbi texnikası Rusiya sərhədinə doğru hərəkətə keçdi

NATO qüvvələrinin hərbi texnikası Litvanın cənub-qərbində, Kalininqrad vilayəti yaxınlığında yerləşən Kalvariya-Kazlu-Ruda marşrutu üzrə hərəkətə başlayıb.

Publika.az xəbər verir ki, bu barədə Litva Müdafiə Nazirliyi məlumat yayıb.

Bildirilib ki, müttəfiq qüvvələrin planlı yerdəyişməsi ölkənin müdafiə qabiliyyətinin gücləndirilməsi məqsədi daşıyır və hər hansı konkret təhlükə ilə bağlı deyil. Bununla belə, son günlər Suvalki dəhlizi ətrafında hərbi texnika və şəxsi heyətin hərəkətinin intensivliyi nəzərəçarpacaq dərəcədə artıb.

Təxminən 100 kilometr uzunluğunda olan Suvalki dəhlizi Polşa ilə Litvanı birləşdirərək Baltik ölkələrini NATO-nun digər üzvləri ilə əlaqələndirir. Eyni zamanda bu ərazi Belarusla Rusiyanın Kalininqrad vilayətini bir-birindən ayırır.

Qeyd edək ki, NATO son illərdə Baltik ölkələrində mütəmadi hərbi təlimlər keçirir. Litva, Latviya və Estoniya alyansın şərq cinahının daha da gücləndirilməsinin vacibliyini dəfələrlə bəyan edib.

Kreml isə NATO-nun Rusiya sərhədləri yaxınlığında hərbi mövcudluğunu milli təhlükəsizliyə təhdid adlandıraraq buna cavab tədbirləri görəcəyini açıqlayıb.

Adəm