“Tesla”nın Çindəki biznesi satıla bilər

ABŞ-ın elektromobil istehsalçısı “Tesla” Çindəki biznesini sata və ya onu ayrıca hüquqi qurum kimi ayıra bilər.

Publika.az xəbər verir ki, bu barədə The Wall Street Journal (WSJ) mənbələrə istinadla məlumat yayıb.

Bildirilir ki, “Tesla”nın Çindəki bölməsinin satılması planı şirkətin “SpaceX” ilə birləşdirilməsinə hazırlıqla bağlıdır. “SpaceX” ABŞ Müdafiə Nazirliyinin (Pentaqon) əsas podratçılarından biridir və bu status şirkətin fəaliyyətinə ciddi məhdudiyyətlər qoyur. Birləşmə baş verəcəyi təqdirdə, “Tesla”nın Çin bölməsinin ümumi strukturdan ayrılması mümkün maraqlar toqquşmasının və tənzimləyici risklərin qarşısını almağa imkan verəcək.

Məsələdən xəbərdar mənbələrin sözlərinə görə, İlon Mask son illərdə “Tesla”nın fəaliyyətini elə təşkil edib ki, şirkətin ABŞ və Çin bölmələri arasında heç bir əlaqə olmasın. O, iki ölkə arasında geosiyasi gərginlik yaranacağı halda, heç olmasa “Tesla”nın ABŞ-dakı hissəsinin fəaliyyətini fasiləsiz davam etdirəcəyinə əmin olmaq istəyib.

“The Times” nəşrinin məlumatına görə, İlon Maskın “Tesla” şirkətindən 2025-ci il üçün ala biləcəyi əməkhaqqı 158 milyard ABŞ dollarına çata və 12 rəqəmli məbləğ təşkil edə bilər. Söhbət şirkətlə bağlanmış kompensasiya sazişi çərçivəsində nəzərdə tutulan ödənişdən gedir. Həmin sazişə əsasən, səhmdarlar dünyanın ən varlı şəxsi olan Maskın tələb etdiyi kompensasiya paketinin ödənilməsinə razılıq veriblər.

Hüseyn İbadlı