İspanlar Mərakeşi ittiham edir: Miqrantlarla hökumətə təzyiq göstərir

İspaniyada keçirilən rəy sorğusu göstərib ki, ölkə əhalisinin böyük əksəriyyəti Mərakeşin miqrasiya böhranından baş nazir Pedro Sançesə siyasi təzyiq vasitəsi kimi istifadə etdiyini düşünür.

Publika.az xəbər verir ki, "La Razón" qəzetinin dərc etdiyi "NC Report" sorğusuna əsasən, respondentlərin 69,3 faizi Mərakeşin İspaniya hökumət başçısını miqrant axını ilə "şantaj etdiyini" hesab edir. Sorğu iştirakçılarının 22,9 faizi bununla razılaşmayıb, 7,8 faizi isə cavab verməkdə çətinlik çəkib.

Sorğu iştirakçıları Mərakeşin ümumi siyasətinə də mənfi qiymət veriblər. Belə ki, respondentlərin 77,3 faizi bu siyasəti İspaniyaya qarşı düşmən mövqeyi kimi qiymətləndirib. Əks fikirdə olanların payı 16,1 faiz, mövqe bildirməyənlərin payı isə 6,6 faiz təşkil edib.

Araşdırma iyulun 31-dən avqustun 3-dək 1000 nəfər yetkin yaşlı İspaniya vətəndaşı arasında aparılıb. Statistik xəta payının 3,17 faiz olduğu bildirilib.

Sorğu İspaniyanın Şimali Afrikadakı Mərakeşlə həmsərhəd muxtar şəhəri Seutada baş verən son hadisələr fonunda keçirilib. İyulun sonunda şəhərə kütləvi miqrant axını qeydə alınıb.

İspaniya Daxili İşlər Nazirliyinin məlumatına görə, Seutaya təxminən 72 min nəfər gəlib. Onlardan 70 minə yaxını sonradan yenidən Mərakeş ərazisinə qayıdıb.

Adəm