Pxenyan Tokionu hədələdi: Bu, ada ölkəsinə məhvedici fırtına gətirəcək

Yaponiya sürətlə hərbiləşmə kursuna keçir və hərbi potensialını daha da artırmaq üçün şərait yaradır.

Publika.az xəbər verir ki, bu barədə Şimali Koreyanın Mərkəzi Teleqraf Agentliyi (KCNA) məlumat yayıb. Pxenyan Tokionun siyasətini Yasukuni məbədinə səfərlərlə əlaqələndirib.

Baş nazir Sanae Takaiti avqustun 15-də Yasukuni məbədinə ritual qurban göndərib. Şimali Koreya tərəfi həmçinin Yaponiyanın qabaqlayıcı zərbələr üçün silahlar yerləşdirməsinə, silah ixracına qoyulan məhdudiyyətlərin yumşaldılması planlarına və nüvə silahından imtina siyasətinə yenidən baxılması ehtimalına diqqət çəkib.

Pxenyan Takaitini Yaponiyanın keçmişdəki təcavüzkar siyasətinə görə peşmanlıq ifadə etməməkdə ittiham edib. Şimali Koreya bunu tarixin yenidən yazılması cəhdi və revizionizm kimi qiymətləndirib.

Yapon siyasətçilərinin, o cümlədən müdafiə nazirinin Yasukuni məbədini ziyarət etməsi isə ölkənin siyasi dairələrində militarist meyillərin güclənməsinin göstəricisi kimi təqdim olunub.

KCNA-nın şərhində qeyd olunub ki, Tokionun məğlubiyyət gününün ildönümü ilə əlaqədar “qaldırdığı yeni militarizm dalğası ada ölkəsinə məhvedici fırtına gətirəcək”.

Müəllif: Adəm