Almaniyadan ukraynalı kişilərə çağırış: Sosial yardım yox, cəbhə!

Bavariya hökumətinin başçısı və Xristian Sosial Birliyinin rəhbəri Markus Zöder Almaniyada yaşayan hərbi xidmət yaşında olan ukraynalı kişilərin ölkələrinə qaytarılmasını təklif edib.

Publika.az xəbər verir ki, siyasətçi sosial şəbəkədəki paylaşımında hərbi xidmətə yararlı gənc ukraynalıların Almaniyada sosial təminata arxalanmaq əvəzinə, öz ölkələrinin müdafiəsinə diqqət yetirməli olduğunu bildirib.

Zöderin sözlərinə görə, Almaniyada yaşayan və hərbi xidmət üçün yararlı ukraynalı kişilərin Ukraynaya qayıtmasının təşkili nəzərdən keçirilməlidir. O, bu şəxslərə sosial ödənişlərin verilməsi əvəzinə, onların öz ölkələrinin müdafiəsində iştirak etməsinin vacibliyini vurğulayıb.

Qeyd edək ki, Almaniyanın federal kansleri Fridrix Merts də daha əvvəl hərbi xidmətə yararlı ukraynalı kişilərin Almaniyaya girişinin məhdudlaşdırılmasının zəruriliyi barədə dəfələrlə danışıb.

İyulun sonunda isə Avropa İttifaqı Şurası Ukraynadan olan 23-60 yaşlı kişilərin Aİ ölkələrində avtomatik sığınacaq hüququ əldə etməməsini nəzərdə tutan yeni qaydaları yekun olaraq təsdiqləyib.

Müəllif: Adəm