Təyyarədə faciənin qarşısını alan 4 israilliyə prezident mükafatı veriləcək

İsrail prezidenti İsaak Hersoq “FlyDubai” təyyarəsində pilotu zərərsizləşdirərək mümkün faciənin qarşısını alan dörd İsrail vətəndaşının mükafatlandırılmasını təklif edib.

Publika.az xəbər verir ki, bu barədə “The Times of Israel” məlumat yayıb.

Bildirilib ki, hadisə zamanı üç sərnişin pilot kabinəsinə daxil olaraq pilotlardan birini zərərsizləşdirib. Həmin şəxsə digər pilot tərəfindən bıçaqla xəsarət yetirilib. Təyyarədə olan israilli həkim isə yaralıya tibbi yardım göstərib.

Həkimin həyat yoldaşı da hadisənin üzə çıxmasında mühüm rol oynayıb. O, pilot kabinəsində qeyri-adi vəziyyət olduğunu hiss edərək həyəcan siqnalı verib.

Hersoq sərnişinlərin və ekipajın operativ müdaxiləsinin böyük fəlakətin qarşısını aldığını bildirib və dörd vətəndaşın mülki qəhrəmanlığa görə prezident mükafatı ilə təltif olunmasını tövsiyə edib.

Hadisədən sonra təyyarənin idarəetməsi digər pilotların nəzarətinə keçib və təyyarə Səudiyyə Ərəbistanına yönləndirilərək uğurla yerə endirilib.

Müəllif: Roza