Trampın tənqidindən sonra Zelenski Rubionun qapısını döydü: Təcili danışıq

Ukrayna prezidenti Vladimir Zelenski ABŞ lideri Donald Trampın tənqidindən sonra ABŞ dövlət katibi Marko Rubio ilə telefonla danışıb. Tərəflər hava hücumundan müdafiə sistemləri üçün raket-ələkeçiricilərin tədarükünü və “Starlink” peyk rabitəsi sisteminin fəaliyyəti ilə bağlı problemləri müzakirə ediblər.

Publika.az xəbər verir ki, Zelenski bu barədə “Telegram” kanalında məlumat verib.

Ukrayna liderinin sözlərinə görə, Rubio ilə söhbət zamanı bir sıra mühüm məsələlər ətrafında fikir mübadiləsi aparılıb. O, xüsusilə ballistik raketlərdən müdafiə üçün ələkeçiricilərin tədarükünün vacibliyini vurğulayıb.

Zelenski, həmçinin “Starlink” və “Starshield” sistemləri ətrafındakı vəziyyətə toxunaraq, onların fəaliyyətinin bərpa edilməsinin zəruri olduğunu bildirib.

Ukrayna prezidenti əlavə edib ki, tərəflər problemli məsələlərlə bağlı əlaqələri davam etdirmək barədə razılığa gəliblər.

Qeyd edək ki, bundan əvvəl ABŞ prezidenti Donald Tramp Rusiya ilə danışıqlar məsələsində Zelenskinin yerinə başqa bir şəxsin tapılmasının vaxtı çatdığını bildirmişdi.

Müəllif: Adəm