Diplomlar elektron formada veriləcək - YENİLİK

2025-ci ildən başlayaraq ali təhsil haqqında diplom kağız ilə bərabər elektron formatda əldə edilə bilər.

Publika.az "RİA Novosti"yə istinadən xəbər verir ki, bunu Rusiya Baş nazirinin müavini Dmitri Çernışenko Sankt-Peterburq Beynəlxalq İqtisadi Forumunda (SPIEF) bildirib.

“Biz 2024-cü ilin 25 aprelindən etibarən elektron sənədlərin təqdimatı ilə bağlı təcrübə həyata keçiririk. Proses olduqca sadədir. Diplomların reyestri var və gələn ilki qəbulu gözləyirik. Qanunda göstərilir ki, elektron diplom adi kağız diplom ilə eyni statusa malik olacaq”, - deyən Çernışenko bildirib ki, tələbə sənədi hansı formada alacağını seçmək hüququna malik olacaq.

Xatırladaq ki, Rusiyanın Baş naziri Mixail Mişustin aprelin 25-dən tələbə kartları və qeyd dəftərlərinin elektron formada təqdim olunması haqqında sərəncam imzalayıb. Pilot layihə könüllülük əsasında həyata keçiriləcək və kollec və universitet tələbələri, eləcə də eksperimentdə iştirak edən təşkilatlarda təhsil alan rezident və aspirantlara şamil olunacaq. Onların hazırlığını təsdiq edən sənədlər elektron formaya çevriləcək və daha sonra onların dövlət xidmətləri portalındakı şəxsi kabinetində və QR kod şəklində mobil əlavədə görünəcək.

Adəm Abbaslı