Aİ Trampın qələbəsindən qorxuya düşdü: "Ukrayna bəla içindədir!"

ABŞ prezident seçkilərində Respublikaçılar Partiyasının namizədi Donald Trampın qələbəsindən sonra Ukrayna böyük problemlə üzləşə bilər.

Publika.az xəbər verir ki, bu barədə Avropa İttifaqının (Aİ) rəsmiləri və diplomatları Britaniyanın “The Financial Times” (FT) nəşrinə müsahibəsində bildiriblər.

Avropalı diplomatlar Trampın əsas ştatlardakı qələbəsinin miqyasından şoka düşdüklərini bildiriblər və qeyd ediblər ki, həm xalqın səsini, həm də Seçicilər Kollegiyasını qazanaraq, o, Amerikanın ilk gündəliyində daha da cəsarətli olacaq.

FT-nin həmsöhbətlərindən birinin açıqlamasında bildirdiyi kimi, o, Aİ-də bir çoxları kimi, Trampın prezidentliyi perspektivindən qorxur.

Başqa bir yüksək səviyyəli mənbə isə prosesləri belə şərh edib: "Ukrayna böyük bəla içindədir!"

Qeyd edək ki, Trampı prezident seçkilərində qələbəsi münasibətilə ilk təbrik edənlərdən biri də Ukrayna prezidenti Vladimir Zelenski olub. O, müraciətində Rusiya ilə münaqişənin həllində səmərəli əməkdaşlığa və yardıma ümid etdiyini bildirib.

Adəm Abbaslı