Narkotik başına bəla oldu - Bir aylıq diskvalifikasiya edildi

Avstraliyalı tennisçi Nik Kiriosun kokain testi müsbət nəticə verdiyi üçün bir aylıq diskvalifikasiya edilib.

Publika.az xəbər verir ki, “The Athletic” qəzetinin məlumatına görə, 31 yaşlı idmançı artıq diskvalifikasiya müddətini başa vurub və yarışlara qayıda bilər.

Qadağan olunmuş maddə iyun ayında Mayorkada keçirilən turnir zamanı götürülmüş nümunədə aşkar edilib. Beynəlxalq Tennis Bütövlüyü Təşkilatı (ITIA) əvvəlcə üç aylıq diskvalifikasiyanı nəzərdən keçirsə də, Kirios ixtisaslaşmış müəssisədə müalicə almağa razı olduqdan sonra bu müddəti bir aya endirdi. Araşdırma nəticəsində avstraliyalı idmançının yarışdan kənarda kokain istifadə etdiyi müəyyən edildi. Əgər onun yarış zamanı kokain istifadə etdiyi aşkarlansaydı, dörd ilə qədər diskvalifikasiya ilə üzləşə bilərdi.

Kirios əvvəllər narkotik istifadəsini “böyük bir səhv” adlandırmış və pərəstişkarlarından, ailəsindən, sponsorlarından və övladlarından üzr istəmişdi. O, həmçinin bildirib ki, son illərdə uzunmüddətli sağlamlıq problemləri və xəsarətlər onun fiziki və zehni sağlamlığına ciddi təsir göstərib.