Dərinin gənc qalmasının əsas sirri

Dünya şöhrətli makiyaj ustası Cina Akers dərinin gəncliyini uzatmağın yollarını açıqlayıb.

Publika.az xəbər verir ki, vizajist bu barədə "Express.co.uk"a danışıb.

Ekspertin sözlərinə görə, dəriyə qulluqda əsas qayda nəmləndirmədir. Bu məqsədlə o, qırışları aradan qaldırmağa kömək edən, toxumaların möhkəmliyini və elastikliyini artıran, tərkibində gialuron turşusu olan preparatlardan istifadə etməyi məsləhət görüb. Eyni zamanda mütəxəssis bildirib ki, şəhadət və orta barmaqlarla üzü iki-üç dəqiqə masaj etmək, hər səhər və axşam dərini təmizləmək və nəmləndirmək faydalıdır.

Bundan əlavə, Akers müntəzəm yuxu rejiminə əməl etməyi, günəş kremi istifadə etməyi, antioksidantlarla və omeqa-3 ilə zəngin qidalar yeməyi tövsiyə edib. Məsələn, qoz-fındıq, giləmeyvə, göyərtilər, tərəvəzlər, qızılbalıq, sardina, siyənək və skumbriya və.s

"Bol miqdarda protein də vacibdir, çünki bu, dərinin quruluşu təşkil edən maddələrdən biridir", - ekspert yekunda vurğulayıb.

Aytən Məftun