Sahibkarları incidənlərə qarşı yeni addım - CƏRİMƏLƏR BİR AZ DA ARTIRILSIN

Sahibkarlıq sahəsində aparılan yoxlamaların tənzimlənməsi və sahibkarların maraqlarının müdafiəsi haqqında qanunvericiliyin pozulmasına görə cərimələrin ikiqat artırılmasına dair layihə təsdiqlənib. Bununla bağlı İnzibati Xətalar Məcəlləsinə dəyişiklik layihəsi III oxunuşda parlamentin bu gün keçirilən iclasında müzakirəyə çıxarılıb.

Dəyişikliklə Məcəllənin sahibkarlıq sahəsində aparılan yoxlamaların vahid məlumat reyestrində qeydiyyata alınmadan gerçəkləşdirilməsinə görə vəzifəli şəxslər 2 000 manatdan 3 000 manatadək məbləğdə cərimə ediləcəklər.

Məcəllənin hazırkı bəndinə əsasən isə sahibkarlıq sahəsində aparılan yoxlamaların vahid məlumat reyestrində qeydiyyata alınmadan gerçəkləşdirilməsinə görə vəzifəli şəxslər 1000 manatdan 1500 manatadək məbləğdə cərimə edilirlər.

Bununla bağlı mövzunu şərh edən iqtisadçı-ekspert Pərviz Heydərov Publika.az-a açıqlamasında bildirdi ki, sözügedən dəyişikliklər sahibkarlıq sahəsində aparılan yoxlamaların Vahid Məlumat Reyestrində qeydiyyata alınmadan gerçəkləşməsinin qarşısını alır və buna qaarşı cərimələri artırır.

Bu yoxlamaların müvafiq dövlət orqanları tərəfindən həyata keçirildiyini söyləyən müsahibimiz qeyd etdi ki, əslində aparılan yoxlamaların dayandırılması haqqında qanun var və 2023-cü ilin yanvarın 1–də başa çatacaq:

“Qanunun müddəti ancaq ya Milli Məclis, ya da prezident İlham Əliyev tərəfindən artrıla bilər. Dövlətimizin başçısı təşəbbüs göstərərək yenidən layihə təqdim edə və sahibkarlıq sahəsində yoxlamaların dayandırılması haqqında yeni qanun qəbul etdirə bilər. Hətta bunun dayandırılması haqqında müddəti növbəti ilə qədər uzada bilər. Amma hazırda söhbət ondan gedir ki, İnzibati Xətalar Məcəlləsinə edilən dəyişikliyə əsasən, sahibkarlıq subyektlərində qeyri-qanuni və dolayı yolla aparılan yoxlamalara görə cərimələr artırılır və bununla hökumət rəsmi instansiyalara xəbərdarlıq edir. Bildirir ki, lüzumsuz yerə sahibkarlıq subyektləri yoxlanılmasın və onun fəaliyyətinə müdaxilə edilməsin. Əgər belə bir məcburiyyət yaranarsa, bunu mütləq Vahid Məlumat Reyestrinə rəsmi qaydada qeydə almaqla həyata keçirsinlər”.

Bu dəyişikliyi çox müsbət addım kimi dəyərləndirən ekspert hesab edir ki, bu cərimələr bir az da artırılmalıdır:

“Çünki, bu, ölkədə sahibkarlığın inkişafına xidmət edir. Eyni zamanda, sahibkarların lüzumsuz yerə incidilməsinin, onların fəaliyyətinə müdaxilə edilməsinin qarşısını alır”.

Rövşən Ziya