Müğənni İzzət Bağırov məhkəmədə ifadə verdi

Bakı Ağır Cinayətlər Məhkəməsində xuliqanlıqda və qəsdən sağlamlığa ağır zərər vurmaqda təqsirləndirilən Tural Cahangirov, müğənni İzzət Bağırovun sürücüsü Elçin Cavadzadə və Rəsul Ələkbərovun cinayət işi üzrə məhkəmə prosesi davam etdirilib.

Hakim Tamella Nəsrullayevanın sədrliyi ilə keçirilən prosesdə müğənni İzzət Bağırov ifadə verərək, bildirib ki, zərərçəkmiş Elməddin adlı şəxs onu təhqir edib və mübahisə bundan sonra başlayıb: "Səhnədə olan vaxt operator məni çəkirdi. Elməddin də operatorun üstünə qışqırdı ki, məni yox, onu çəksin və sonra ünvanıma nalayiq sözlər işlətdi. Onu tərbiyəli davranmağa dəvət etdim. Dedim ki, istəmirsə, mən oxumaya bilərəm. 7-8 ilin sənətkarıyam, bu cür hərəkət yaraşmaz. Bundan sonra mikrofonu söndürüb səhnədən getdim. Sonra baş verənlərdən xəbərim olmayıb".

Proses fevralın 9-da davam etdiriləcək.

Qeyd edək ki, ötən ilin yayında paytaxt sakini Novruz Aslanlının restoranda təşkil etdiyi şənlik zamanı qonaqlardan biri ilə müğənni İ.Bağırov arasında mübahisə yaranıb. Mübahisəyə səbəb qonağın operatordan müğənnini deyil, onları lentə almağı xahiş etməsi olub. Müğənni buna etiraz əlaməti olaraq mərasimi yarımçıq tərk edib. Bu isə mərasimin təşkilatçısının narazılığına səbəb olub.

N.Aslanlı və qohumları ilə İ.Bağırovun sürücüsü, habelə restoranın əməkdaşları arasında yaranmış mübahisə sonda əlbəyaxa dava ilə nəticələnib. Dava zamanı N.Aslanlının başına küt alətlə zərbə endirilib.

Hadisəni törədən şəxslər saxlanılıb. (apa)