Rus və ukraynalı idmançılar oteldə dava saldı

Rusiya Liqasının “Şinnik Yaroslavl” komandası ilə Ukraynanın “FK Minaj” komandasının futbolçuları arasında Belekdə qaldıqları oteldə dava çıxıb.

Publika.az Türkiyə mediasına istinadən xəbər verir ki, dava zamanı bəzi futbolçuların sümüklərinin qırıldığı bildirilib. Fevralın 13-də baş verən davanın görüntüləri sosial mediada yayılıb.

"Şinnik Yaroslavl" komandasında çıxış edən rusiyalı futbolçu Artyom Semeykin bildirib ki, ciddi zədə almayıb:

"Hər şey qaydasındadır, özümü yaxşı hiss edirəm. Açığı, hər şeyin necə başladığını bilmirəm. Otağımda yatırdım, sonra səs eşitdim və dəhlizə qaçdım. 20 nəfər var idi. Aydındır ki, mən Herakl deyiləm, lakin ölkəm təhqir olunurdu. Odur ki, başqa cür mümkün deyildi. Rusiyanı müdafiə etdim".

Hadisəni Ukrayna klubunun planlaşdırdığını deyən rusiyalı futbolçu qeyd edib ki, insident liftdə də davam edib:

"Liftdə daha bir insident oldu. Bir oyunçumuz yeməkdən qayıdardı, tək idi. Liftdə Ukraynadan bir neçə nəfər yaxınlaşıb onu döyməyə başladı. Mən günahkarları və qalibi müəyyən etmək istəmirəm”.

Aytən Məftun