Azərbaycanda toy yasa döndü, iki bacı öldü - VİDEO/YENİLƏNDİ

Biləsuvarda baş verən qəza ilə bağlı TƏBİB məlumat yayıb.

Publika.az xəbər verir ki, bu gün saat 17 radələrində Biləsuvar rayonunda baş verən yol-nəqliyyat hadisəsi nəticəsində xəsarət alan 4 nəfər (qadın) Biləsuvar Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.

Hazırda pasiyentlərin müalicəsi tibb müəssisəsində davam etdirilir. Vəziyyətləri ağır olaraq qiymətləndirilir.

Qeyd edək ki, hadisə nəticəsində 2 nəfərin həkiməqədər ölüm faktı qeydə alınıb.

xxx

19:05

Biləsuvarda ölümlə nəticələnən yol qəzasının bəzi təfərrüatı məlum olub.

DİN-in Mətbuat Xidmətinin Lənkəran regional qrupundan Teleqraf-ın sorğusuna cavab olaraq bildirilib ki, dekabrın 27-də saat 16:50 radələrində Biləsuvar rayonunun Çaylı kəndi ərazisində ölümlə nəticələnən yol nəqliyyat hadisəsi baş verib.

F.Rüstəmovanın idarə etdiyi "Lexus" markalı minik avtomobili idarəetmənin itirilməsi nəticəsində su kanalına aşıb. Nəticədə avtomobildə olan 2 nəfər sərnişin hadisə yerində ölüb.

Qəzada ölənlər iki bacı olublar. Onlar digər sərnişinlərlə əmisi oğlanlarının nişan mərasiminə gedirmişlər.

Araşdırma aparılır.

xxx

18:36

Biləsuvarda toy karvanında ağır yol-nəqliyyat hadisəsi qeydə alınıb.

Publika.az Teleqraf-a istinadla xəbər verir ki, hadisə Biləsuvar–Bəhramtəpə avtomobil yolunun Biləsuvar rayonundan keçən hissəsində baş verib.

Toy karvanında hərəkət edən avtomobillərdən biri naməlum səbəbdən idarəetmədən çıxaraq yol kənarındakı kanala düşüb.

İlkin məlumata görə, qəza nəticəsində iki nəfər ölüb.

Hazırda hadisə yerində müvafiq qurumların əməkdaşları tərəfindən araşdırma aparılır. Qəzanın dəqiq səbəbləri araşdırmalar başa çatdıqdan sonra məlum olacaq.