Milliləşdirilən voleybolçu azərbaycanlıları təhqir etdi

İyunun 7-də “Sərhədçi” İdman Kompleksində “Baku Fires”lə Kubanın “Cuba Domadores” boks klubları arasında WSB liqasının finalının ilk görüşündə xoşagəlməz olay yaşanıb.

Publika.az xəbər verir ki, görüşü izləyənlər arasında “Rabitə”nin yeni transfer etdiyi kubalı voleybolçular da olublar.

5-ci döyüşün kubalı iştirakçısı Xulio Sezar La Kruz rinqə dəvət olunanda azarkeşlər rəqibi uğultuyla qarşılayıb. Bunu olduqca sərt qarşılayan “Rabitə”nin 4-cü zona oyunçusu Vilma Salas Rosell isə üzünü azarkeşlərə tərəf tutaraq nümayişkaranə şəkildə orta barmağını göstərib.

Peşəkar voleybolçunun, ölkəmizdə milyonlar qazanan xanım idmançının bu tərbiyəsizliyinə izah tapmaq olmur. Məsələnin təəccüb doğuran məqamı odur ki, azərbaycanlılara qarşı tərbiyəsizlik edən bu voleybolçu həm də milliləşdirilib.

Tərbiyəsizliyini nümayişkaranə surətdə göstərməkdən çəkinməyən voleybolçu Azərbaycan millisinin şərəfini hansı meyarlara əsasən qoruyacaq?

Təbii ki, bu suala Voleybol Federasiyasının rəhbərliyi cavab verməlidir.