İdman

Mayaminin açarı Messiyə verildi - FOTO

6 Noyabr 2025 15:30

Mayami meri Frensis Suares “İnter Mayami”nin və şəhərin inkişafına verdiyi töhfələrə görə Lionel Messini simvolik açarla təltif edib.

Publika.az xəbər verir ki, bu barədə ESPN məlumat yayıb.

Mərasim Amerika Biznes Forumu çərçivəsində “Kaseya Center”də keçirilib. Məhz burada argentinalı futbolçuya şəhərin simvolik açarı təqdim olunub. Suares tədbirdə çıxışı zamanı deyib:

“Bu açarı sizə təqdim etmək istəyirəm. Şəhərimiz, ölkəmiz və ümumilikdə futbol üçün etdiklərinizə görə”.

Xatırladaq ki, çoxsaylı “Qızıl top” sahibi Messi 2023-cü ilin yayında “İnter Mayami”yə qoşulub. O, bu müddətdə MLS-in müntəzəm çempionatını və 2023-cü il Liqalar Kubokunu qazanıb. Bundan başqa, 2024-cü ildə ABŞ prezidenti tərəfindən Azadlıq Medalı ilə təltif olunub.

Messi 2025-ci il MLS mövsümündə 28 oyunda 29 qol və 16 məhsuldar ötürmə ilə çıxış edib, liqanın ən məhsuldar futbolçusu olub.

Heybət