Ronaldonu bu cəza gözləyir

Portuqaliya millisinin ulduz futbolçusu Kriştiano Ronaldo yalnız 2026-cı il dünya çempionatının seçməsinin son matçını deyil, həm də mundialın startını buraxa bilər.

Publika.az xəbər verir ki, bu barədə ESPN məlumat yayıb.

İrlandiya ilə oyunun ikinci hissəsində Ronaldo cərimə meydançasında mövqe uğrunda mübarizə zamanı rəqibinə dirsəklə zərbə endirib. Hakim əvvəlcə 40 yaşlı futbolçuya sarı vərəqə göstərsə də, VAR-a baxdıqdan sonra onu meydandan qovub.

40 yaşlı forvardı üçmatçlıq diskvalifikasiya təhlükəsi gözləyir. Bu isə “aqressiv oyun və ya rəqibə hücum, xüsusilə dirsək zərbələri” səbəbindən dünya çempionatının ilk iki oyununu buraxa biləcəyi anlamına gəlir.

Bir neçə dəfə “Qızıl top” mükafatının qalibi olmuş futbolçu millidə keçirdiyi 226 oyunda ilk dəfə qırmızı vərəqə alıb.

Portuqaliya matçı 0:2 hesabı ilə uduzsa da, F qrupunun lideri olaraq qalır və 10 xalı var. 7 xala malik İrlandiya isə üçüncü pillədədir.

Portuqaliya millisi növbəti oyununu noyabrın 16-da səfərdə Ermənistanla keçirəcək. Matçın start fiti Bakı vaxtı ilə 18:00-a təyin edilib.

Heybət