Usikin Uaylderlə döyüşü harada və nə vaxt olacaq? - Meneceri açıqladı

WBC, IBF, WBA Super, IBO və The Ring versiyaları üzrə çempion olan ukraynalı ağır çəkili boksçu Aleksandr Usik ilə amerikalı Deontey Uaylder arasında qarşılaşma 2026-cı ilin yazında ABŞ-da keçirilə bilər.

Publika.az xəbər verir ki, bu barədə Usikin meneceri Eqis Klimas “Boxing Media” nəşrinə məlumat verib.

Onun sözlərinə görə, döyüş aprel ayının sonu və ya mayın əvvəlində planlaşdırılır. Potensial keçiriləcək şəhərlər kimi Las-Veqas və Los-Anceles nəzərdən keçirilir. Döyüşün WBC tərəfindən könüllü müdafiə görüşü kimi təsdiqlənməsi gözlənilir.

Aleksandr Usik sonuncu dəfə iyul 2025-ci ildə rinqə çıxıb və revanş görüşündə britaniyalı Daniel Dubuaunu nokautla məğlub edib. Ukraynalı boksçunun peşəkar karyerasında 24 qələbəsi var, onlardan 15-i nokautla qazanılıb.

Deontey Uaylder isə sonuncu döyüşünü iyun 2025-ci ildə keçirib və həmvətənlisi Tayrell Entoni Herndonu texniki nokautla məğlub edib. Amerikalı boksçunun aktivində 44 qələbə (43 nokaut), 4 məğlubiyyət və 1 heç-heçə var.