Qvardiolanın restoranı bağlandı: Milyonluq zərərlə

Mançesterdə yerləşən və "Mançester Siti"nin baş məşqçisi Pep Qvardiolanın şəriklərindən biri olduğu "Tast" restoranı açılışından yeddi il sonra fəaliyyətini dayandırıb.

Publika.az xəbər verir ki, müəssisə bu müddət ərzində ümumilikdə təxminən 2 milyon funt sterlinq zərər edib. Bağlanmanın əsas səbəbi kimi biznes üçün son dərəcə çətin şərait və xərclərin artması göstərilir.

Katalon üslublu yüksək mətbəx konsepsiyasına malik restoran Pep Qvardiola və "Mançester Siti"nin icraçı direktoru Ferran Sorianoya məxsus idi. Klubun keçmiş idman direktoru Çiki Beqiristayn da layihənin investorlarından biri olub. Klub rəhbərliyi 2022-ci ildə məhz "Tast" restoranında Erlinq Haalandın transferini qeyd etmişdi.

Liverpul Universitetinin futbol maliyyəsi üzrə eksperti Kiran Maquayrın sözlərinə görə, restoran 2024-cü il mövsümündə 200 min funtdan çox zərər edib və bununla da ümumi itkilər təxminən 1,9 milyon funta çatıb. Müəssisə səhmdarların investisiyaları hesabına fəaliyyətini davam etdirsə də, sonda bağlanmaq qərarı verilib.

Heybət