Ərəblər sükutu pozdular: Ronaldonun boykotu haqsızdır?

Səudiyyə Ərəbistanı Pro Liqası “Əl-Nəsr”in hücumçusu Kriştiano Ronaldonun transfer pəncərəsində komandanın gücləndirilməməsindən narazı qalması ilə bağlı yayılan məlumatlara münasibət bildirib.

Publika.az xəbər verir ki, çempionat bu səbəbdən komandanın oyunlarını boykot edən portuqaliyalı futbolçunu haqsız hesab edib.

“Səudiyyə Peşəkar Liqası sadə prinsip üzərində qurulub. Hər bir klub eyni qaydalar çərçivəsində müstəqil fəaliyyət göstərir.

Klubların öz idarə heyətləri, rəhbərləri və futbol idarəçiliyi var. Oyunçu transferləri, xərclər və strategiya ilə bağlı qərarlar maliyyə dayanıqlığını və rəqabət balansını təmin etmək məqsədi daşıyan çərçivə daxilində məhz klublar tərəfindən qəbul edilir. Bu struktur liqadakı bütün klublara eyni şəkildə tətbiq olunur.

Kriştiano gəlişindən bəri “Əl-Nəsr”in fəaliyyətində tam şəkildə iştirak edir və klubun inkişafı ilə ambisiyalarında mühüm rol oynayıb. Hər bir yüksək səviyyəli idmançı kimi, o da qalib gəlmək istəyir. Lakin nə qədər əhəmiyyətli olmasından asılı olmayaraq, heç bir şəxs öz klubunun hüdudlarından kənarda qərar qəbul etmir.

Son transfer fəaliyyəti bu müstəqilliyi açıq şəkildə göstərir. Bir klub heyətini müəyyən cür gücləndirdi, digəri isə fərqli yanaşma seçdi. Bunlar təsdiqlənmiş maliyyə parametrləri çərçivəsində klubların verdiyi qərarlardır.

Liqadakı rəqabət özü hər şeyi deyir. Dörd lider arasında xallar fərqi böyük deyil, bu səbəbdən çempionluq uğrunda mübarizə hələ də son dərəcə aktivdir. Bu balans sistemin nəzərdə tutulduğu kimi işlədiyini əks etdirir.

Əsas diqqət futbolun özünə, meydanda olan oyuna və futbolçularla azarkeşlər üçün layiqli, rəqabətli yarışın qorunmasına yönəlib”, - deyə qeyd olunub.

Heybət