"Nyukasl"ın futbolçuları "Qarabağ"la oyunda nəyin üstündə mübahisə ediblər?

"Nyukasl"ın "Qarabağ"a 6:1 hesabı ilə qalib gəldiyi UEFA Çempionlar Liqasının pley-off mərhələsinin ilk oyununda komanda daxilində insident yaşanıb.

Publika.az xəbər verir ki, vinger Entoni Qordon və kapitan, müdafiəçi Keran Trippye diqqət mərkəzində olublar. Ulduz futbolçular ilk hissədən sonra meydandan çıxarkən mübahisə ediblər. Trippye komandasının qazandığı ikinci penaltini Entoninin vurmasından narazı qalıb və buna əsəbiləşib.

Qordon ilk hissənin sonunda təyin edilən 11 metrlik cərimə zərbəsinə qədər artıq het-trik etmişdi, lakin həmin vaxt cinah oyunçusu həmkarının etirazına baxmayaraq penalti zərbəsini yerinə yetirib.

Zərbə dəqiq olsa da, kapitanın hirsi soyumayıb. Keran soyunub-geyinmə otağına gedərkən hisslərini Qordon qarşısında açıq şəkildə göstərib.

Bu məsələ "Nyukasl" azarkeşlərinin marağına səbəb olub. Onlar iki cəbhəyə bölünüb. Bir sıra tərəfdarlar insidentdən sonra Qordonun tərəfində dayanıb və müntəzəm penalti vuran oyunçu kimi zərbə vurmasında heç bir problem olmadığını vurğulayıblar.

Digər qrup azarkeşlər isə hesab edirlər ki, belə məqamda başqa futbolçuya, xüsusi ilə hücumçu Nik Voltemadeyə penalti verilsəydi, komanda üçün psixoloji baxımdan faydalı olardı.

Heybət