Hakan Çalhanoğlunun "İnter"dəki taleyinə aydınlıq gəldi

"İnter" yarımmüdafiəçi Hakan Çalhanoğlunu 2026/27 mövsümündə də komandada saxlamaq qərarına gəlib.

Publika.az xəbər verir ki, bu barədə "FCInter1908" məlumat yayıb.

Mənbənin bildirdiyinə görə, 32 yaşlı futbolçu ilə müqavilənin uzadılması üzrə razılıq əldə olunmayıb. Bu qərar tərəflər arasında bir növ kompromis kimi qiymətləndirilir. Çalhanoğlu hazırda illik 6,5 milyon avro maaş aldığı müqaviləyə bərabər və ya daha yaxşı şərtlərlə qalmaq istəyirdi. Lakin klubun gənc futbolçulara üstünlük verməsi və 30 yaşdan yuxarı oyunçularla müqavilələrin uzadılmasına qoyulan sərt məhdudiyyətlər buna imkan verməyib.

Vəziyyətin açıq münaqişəyə çevrilməməsi üçün tərəflər mövcud şərtlərlə davam etmək barədə razılığa gəliblər. Beləliklə, Hakan Çalhanoğlu hazırkı sözləşməsinin sonuna qədər komandada qalacaq. Gələcəkdə şərtlər dəyişərsə və futbolçu maaşında endirimə razı olarsa, yeni müqavilə ehtimalı açıq qalır.

Qeyd edək ki, türkiyəli yarımmüdafiəçi 2021-ci ilin iyulundan "İnter"də çıxış edir. Onun müqaviləsi 30 iyun 2027-ci ilə qədər qüvvədədir. Cari mövsümdə 30 oyunda 12 qol vurub və 7 məhsuldar ötürmə edib. "Transfermarkt" portalına görə, futbolçunun transfer dəyəri 18 milyon avro təşkil edir.

Heybət