Bu federasiya FIFA-ya etiraz edir: Trampa verilən mükafat ləğv edilməlidir

Norveç Futbol Federasiyasının rəhbəri Lise Klaveness 2025-ci ildən FIFA tərəfindən təsis olunan Sülh Mükafatını tənqid edib.

Publika.az xəbər verir ki, funksioner bu barədə "Reuters"ə açıqlama verib.

“Biz istəyirik ki, bu mükafat ləğv olunsun. Hesab etmirik ki, belə bir mükafatı təqdim etmək FIFA-nın mandatına daxildir. Düşünürük ki, bu işi artıq müstəqil şəkildə həyata keçirən Nobel İnstitutu mövcuddur.

Futbol federasiyaları, konfederasiyalar və həmçinin FIFA üçün dövlət liderlərindən məsafənin şübhə altına düşə biləcəyi vəziyyətlərdən qaçmaq vacibdir. Belə mükafatlar adətən yetərli mexanizmlər və təcrübə olmadıqda çox siyasiləşmiş olur.

Bu, tam ştatlı və çox həssas bir işdir. Hesab edirəm ki, resurslar, mandat və ən əsası idarəetmə baxımından bundan gələcəkdə də qaçmaq lazımdır”, - deyə Klaveness bildirib.

Norveç federasiyası həmçinin "FairSquare" təşkilatının mükafatın təqdim olunma prosesinin araşdırılması təşəbbüsünü dəstəkləyib:

“Belə məsələlərdə mütləq əks-tarazlıq mexanizmləri olmalıdır. "FairSquare" tərəfindən edilən bu şikayət şəffaf müddətlər çərçivəsində araşdırılmalı, əsaslandırmalar və nəticələr açıq şəkildə təqdim olunmalıdır”.

Qeyd edək ki, bu Sülh Mükafatı 5 noyabr tarixində elan olunub və dünya üzrə insanları sülh naminə birləşdirən şəxsləri mükafatlandırmaq məqsədi daşıyır. Mükafat sülhə nail olmaq və insanları bir araya gətirmək üçün xüsusi addımlar atan şəxslərə təqdim olunur.

Canni İnfantino bu mükafatı 2026-cı il dünya çempionatının püşkatma mərasimində şəxsən Donald Trumpa təqdim edib.

Xatırladaq ki, Trampa verilən tunc mükafat Azərbaycanın Xalq rəssamları Səlhab Məmmədov və Əli İbadullayevin “Düşüncələr və arzular” adlı məşhur əsərinin miniatür variantıdır. Səlhab Məmmədov AFFA-nın sabiq baş katibi, hazırda FİFA-da Avropa milli assosiasiyaları departamentinə rəhbərlik edən Elxan Məmmədovun atasıdır.

Heybət