Bayraqsız və himnsiz – DÇ-də rusların statusu bəlli oldu

Rusiya və Belarus idmançıları 2026-cı il Dünya Bədii Gimnastika Çempionatında neytral idmançılar kimi – dövlət bayraqları, himnləri və ya digər milli simvollar olmadan yarışacaqlar.

Publika.az xəbər verir ki, bu barədə Almaniya Gimnastika Federasiyasının mətbuat katibi Torsten Hartmann məlumat verib.

Onun sözlərinə görə, Rusiya və Belarus idmançılarının iştirakı Dünya Gimnastikası qaydalarına uyğun olaraq keçiriləcək. Mükafatlandırma mərasimlərində dövlət bayraqları əvəzinə Beynəlxalq Gimnastika Federasiyasının bayrağı istifadə olunacaq.

Hartman qeyd edib ki, bu status Dünya Gimnastikası, Almaniya Gimnastika İttifaqı və Almaniya federal hökuməti ilə razılaşdırılıb. Müvafiq qərar artıq Rusiya və Belarus hakimiyyət orqanlarına çatdırılıb.

Xatırladaq ki, may ayında Dünya Gimnastika Federasiyası Rusiya və Belarus idmançılarının beynəlxalq yarışlarda iştirakına qoyulan məhdudiyyətləri aradan qaldırdı. Lakin ev sahibi ölkə onların Dünya Çempionatında yalnız neytral kimi iştirak etmələrində israr etdi.