BMV parlayır, Diomande kölgədə qalır: 125 milyon avroluq transfer çətin durumda

“Real Madrid”in La Liqadakı uğurlu startı komandanın hücum xəttində Kilyan Mbappe, Vinisius Junior və Cud Bellinqhemdən ibarət üçlüyün ön plana çıxmasına səbəb olub. Bu vəziyyət isə klubun rekord transferi Yan Diomandenin əsas heyətdəki şanslarını məhdudlaşdırıb.

Publika.az xəbər verir ki, mövsümün ilk iki turunda “Espanyol” və “Real Sosyedad” üzərində qələbə qazanan Madrid təmsilçisi xüsusilə hücumdakı effektivliyi ilə diqqət çəkib. “Real Sosyedad”la oyunda Mbappe het-trik edib, Vinisius bir qol vurub və bir məhsuldar ötürmə verib. Bellinqhem isə iki qol ötürməsi ilə yadda qalıb.

Komandanın baş məşqçisi Joze Mourinyo üç futbolçunun meydandakı uyğunluğundan razılığını ifadə edib. Onların performansı yeni transfer Yan Diomandenin isə kölgədə qalmasına səbəb olub.

19 yaşlı Fil Dişi Sahili millisinin üzvü “Real Madrid”ə 125 milyon avro qarşılığında transfer olunub və klub tarixinin ən bahalı transferi adını daşıyır. Lakin yüksək transfer məbləği onun əsas heyətdə avtomatik yer qazanmasına imkan verməyib.

Diomande Mourinyonun mövsümün ilk iki rəsmi oyununda üstünlük verdiyi 4-2-3-1 sistemində Vinisius və Arda Gülərin gerisində qalıb.

Yeni futbolçu “Espanyol”la matçda hesab 1:1 olarkən ikinci hissədə meydana daxil olub. “Real Sosyedad”la qarşılaşmada isə yalnız 84-cü dəqiqədə Vinisiusun əvəzinə oyuna çıxıb. Beləliklə, Diomande çempionatın ilk iki turunda ümumilikdə yarım saatdan bir qədər çox meydanda olub.

Onun əsas heyətdə daha çox şans qazanmasına Arda Gülərin mövqeyinin dəyişdirilməsi də mane olur. Mourinyo türkiyəli futbolçu üçün sağ cinahda yeni rol müəyyənləşdirib. Arda hücum zamanı daha mərkəzə yaxınlaşaraq yarımmüdafiənin dərinliyində fəaliyyət göstərir.

Hazırkı vəziyyətdə Diomandenin əsas vəzifəsi səbir etmək və rotasiya zamanı veriləcək fürsəti gözləməkdir. “Real Madrid”in hücum xəttində Mbappe, Vinisius və Bellinqhemin yüksək səviyyəli çıxışı davam etdikcə, rekord transferin əsas heyətə daxil olması üçün Mourinyonun rotasiya siyasətindən yararlanması lazım gələcək.