Leao “Qalatasaray”da

“Qalatasaray” Portuqaliya millisinin sol cinah oyunçusu Rafael Leaonun transferi ilə bağlı rəsmi açıqlama yayıb.

Publika.az xəbər verir ki, sarı-qırmızılı klubun açıqlamasında bildirilib:

“Peşəkar futbolçu Rafael Aleksandr Da Konseysao Leao transferi ilə bağlı futbolçu və onun klubu “Milan” ilə rəsmi danışıqlara başlanılıb”.

Qeyd edək ki, Rafael Leao 10 iyun 1999-cu ildə Portuqaliyanın Almada şəhərində anadan olub. Futbola “Sportinq”in akademiyasında başlayan hücumçu 2018-ci ildə əsas komandada debüt edib. Həmin il Fransanın “Lill” klubuna keçən Leao burada bir mövsüm keçirib və 26 oyunda 8 qol vurub.

2019-cu ildə təxminən 35 milyon avro qarşılığında “Milan”a transfer olunan portuqaliyalı futbolçu klubun əsas simalarından birinə çevrilib. 2021/22 mövsümündə “Milan”la İtaliya çempionu olub və A Seriyasının ən yaxşı futbolçusu seçilib. 2022/23 mövsümündə isə 48 matçda 16 qol və 12 məhsuldar ötürmə ilə karyerasının ən məhsuldar mövsümlərindən birini keçirib.

2026-cı ilin iyununa qədər “Milan”da 291 oyuna çıxaraq 80 qol və 65 assist edən Leao klub tarixinin önəmli futbolçularından birinə çevrilib. O, həmçinin 2025-ci ildə Portuqaliya ilə UEFA Millətlər Liqasının qalibi olub.