Talişkadan "Fənərbağça"ya şok cavab

Anderson Talişka ilə yollarını ayırmaq istəyən “Fənərbağça”nın qarşısına braziliyalı futbolçunun şərti çıxıb.

Publika.az xəbər verir ki, Türkiyə Super Liqasında yeni mövsümdə mütləq çempionluq hədəfləyən “Fənərbağça” transfer çalışmalarını sürətlə davam etdirir. 10+4 legioner qaydasına görə bəzi futbolçularla yollarını ayırmaq istəyən İstanbul klubu gözlənilməz problemlə üzləşib.

“Fənərbağça” Anderson Talişkanın transferi ilə bağlı Birləşmiş Ərəb Əmirliklərinin “Əl-Cəzirə” klubu ilə razılığa gəlib. Braziliyalı ulduz isə bu iddialardan sonra sosial media hesabında diqqətçəkən paylaşım edib. Talişka “İnsanlar istifadə edilib sonra bir kənara atılacaq istehlak əşyaları deyil” sözlərini yazıb.

İki illik müqaviləsi olan Anderson Talişka ilk növbədə komandada qalmaq istəyir. Braziliyalı futbolçu yaxın vaxtlarda daha böyük evə köçüb və burada yeni həyat qurub.

Braziliyalı ulduzun klubdan ayrılmaq üçün irəli sürdüyü şərt də məlum olub. Talişka “Fənərbağça”dan bütün maliyyə öhdəliklərinin, yəni klubun ona olan bütün borclarının ödənilməsini tələb edir.

Futbolçu ilə klub rəhbərliyi arasında yaxın günlərdə keçiriləcək görüşdən sonra braziliyalının gələcəyi ilə bağlı qərar veriləcək.