DÇ-2030-un finalı uğrunda mübarizə: Sançes FİFA prezidentinə və Mərakeşə meydan oxudu

İspaniyanın baş naziri Pedro Sançes hökumətinin 2030-cu il dünya çempionatının finalının İspaniyada keçirilməsi üçün əlindən gələn hər şeyi edəcəyini vurğulayıb. O, final matçının Mərakeşə keçirilməsi ehtimalını rədd edərək, ölkəsinin turnirin ən vacib oyununa öz ərazisində ev sahibliyi etməyə layiq olduğunu bildirib.

Publika.az xəbər verir ki, Sançes bazar ertəsi İspaniyanın “SER” kanalına verdiyi müsahibədə FIFA prezidenti Canni İnfantinonun finalı Mərakeşə keçirməyə nail olmaq ehtimalı ilə bağlı suala cavab olaraq “finalın burada keçirilməsini təmin etmək üçün çalışacağını” deyib. O, həmçinin “İspaniyanın dünya çempionatını öz ərazisində qazanmasının vaxtı çatıb” ifadəsini işlədib.

İspaniyanın baş naziri mövqeyini ölkə millisinin son illərdəki uğurları ilə əsaslandırıb. O qeyd edib ki, İspaniya ilk dünya çempionluğunu 2010-cu ildə Cənubi Afrikada qazanıb və daha sonra ABŞ, Meksika və Kanadanın ev sahibliyi etdiyi turnirdə ikinci dəfə dünya çempionu olub. Sançes bu uğurların İspaniyanın finala ev sahibliyi etmək hüququnu gücləndirdiyini bildirib.

İspaniya millisi tarixində ikinci dəfə dünya çempionu titulunu iyulun 19-da əldə edib. Finalda Argentina üzərində əlavə vaxtda Ferran Torresin vurduğu qolla 1:0 hesablı qələbə qazanan İspaniya 2010-cu ildəki Cənubi Afrika zəfərindən sonra ikinci dünya çempionluğunu əldə edib.

İspaniya 2030-cu il dünya çempionatına Portuqaliya və Mərakeşlə birgə ev sahibliyi edəcək. Turnirin bəzi qarşılaşmaları isə dünya çempionatının ilk dəfə keçirilməsinin 100 illiyi münasibətilə digər ölkələrdə təşkil olunacaq.

Uruqvay, Argentina və Paraqvay milli komandalarının açılış oyunları 1930-cu ildə ilk dünya çempionatına ev sahibliyi etmiş Uruqvayda keçiriləcək. Həmin turnirin bütün oyunları o vaxt ölkənin paytaxtı Montevideoda təşkil olunmuşdu.

2030-cu il dünya çempionatının finalının keçiriləcəyi məkan hələ müəyyənləşdirilməyib. İspaniya hökumətinin turnirin ən vacib qarşılaşmasının ölkə ərazisində keçirilməsi uğrunda mübarizəyə açıq şəkildə qoşulması ilə finala ev sahibliyi məsələsi siyasi xarakter almağa başlayıb.

Müəllif: Tural