Rusiya məşhur tennisçinin Kiyevdəki klubunu bombaladı

Ukraynalı tennisçi Yelena Svitolina Rusiyanın hücumu nəticəsində Kiyevdə özünə məxsus olan “SVITO Padel Cklub”a dəyən ziyana reaksiya verib.

Publika.az xəbər verir ki, Svitolina “İnstaqram”da paylaşım edərək Ukrayna idmanının Rusiyanın təcavüzü səbəbindən ciddi itkilərə məruz qaldığını vurğulayıb.

“Bu günə qədər Rusiyanın təcavüzü nəticəsində 776 ukraynalı idmançı və idman xadimi həlak olub. Ukraynada 942 idman qurğusu zədələnib və ya tamamilə dağıdılıb. Bu gün mənim klubum “SVITO PADEL” də onlardan biridir”.

Tennisçi Ukrayna idmançıları üçün digər ölkələrdən olan idmançılarla müqayisədə qeyri-bərabər məşq şəraitini vurğulayıb.

Yelena qeyd edib ki, “Ukraynalı idmançıların digər ölkələrin idmançıları ilə bərabər şərtlərlə beynəlxalq yarışlara hazırlaşmaq və məşq etmək imkanı yoxdur”.

Tennisçi həmçinin beynəlxalq tərəfdaşları Rusiyaya qarşı mübarizədə konkret tədbirlər görməyə çağırıb.

Svitolina yazıb: “Bu mesajla bizi dəstəkləyən beynəlxalq tərəfdaşlarımıza və dostlarımıza – beynəlxalq səhnədə yarışan ukraynalı idmançılara – müraciət etmək və sizdən dəstəyinizi və təcavüzkarı dayandırmağa kömək edə biləcək konkret tədbirlər görməyi xahiş etmək istəyirəm”.

Müəllif: Tural